Македонец во Хрватска затаил околу 2 милиони евра и избегал

Против македонскиот државјанин Ице Г., основното јавно обвиниелство во Осијек подигна обвинение поради сомневање дека затаил 15 милиони куни (блиску 2 милиони евра), пишуваат хрватските медиуми.

Македонецот се терети дека од 2015 до 2016 година во Осијек, како директор на трговското друштво „Тибиа“, го оштетил буџетот на Хрватска, иако наведеното друштво не било регистрирано како даночен обврзник на додадена вредност и не било овластено да издава сметки со данок на додадена вредност, пишува „Гласот на Славонија“.

Се товари дека издал излезни сметки со искажан данок на додадена вредност за испорака на пченка, пченица, соја, јачмен и други земјоделски култури, производи на неколку фирми во градот. После тоа не поднел даночна пријава во вкупна вредност од над 15,7 милиони куни, и неговото друштво „Тибиа“ не платило обврзувачки данот на додадена вредност и за тој износ го оштетил буџетот.

На наведената адреса во моментов ја нема фирмата, а со проверките е утврдено дека даночниот обврзник немал отворено трансакциска сметка, ниту некогаш поднел барање за упис во регистарот на даночни обврзници. Според истрагата, утврдено е дека фирмата е т.н. „тампон фирма“ без вработени и опрема, кое на пазарот на Хрватска почнало да обавува милионски трансакции со продажба на земјоделски култури кон фирми кои исто така биле основани од македонски државјани, а дел од нив и од државјани на Србија.

И покрај обидот да му се врачи решение за спроведување на истрага и повик за испитување, тоа не било можно затоа што не можеле да го најдат. Обвинителството бара од судот да му се суди во отсуство.