Претседателката Сиљановска-Давкова го прими специјалниот претставник на Норвешка за Западен Балкан, Еирик Матисен

Претседателката на државата Гордана Сиљановска-Давкова денеска остварила средба со специјалниот претставник на Кралството Норвешка за Западен Балкан, Еирик Матисен.

Како што информира Кабинетот на Сиљановска-Давкова, двајцата соговорници го поздравиле сојузништво во НАТО, а претседателката изразила благодарност за норвешката континуирана поддршка на македонските евроинтеграциски процеси.

-Таа уште еднаш истакна дека географски, историски и културно, отсекогаш сме биле дел од Европа и дека на нашето пристапување кон Унијата гледа како на реинтеграција. Потенцираше дека како држава сторивме многу, па дури и го сменивме државното и уставно име, укажа на неопходноста од почитување на волјата на граѓаните, како и на политичкото достоинство. Претседателката, исто така, упати на одредбите од договорот за ЕУ, Лисабонскиот договор, Повелбата за фундаменталните права, како и другите релевантни документи со кои се гарантираат националниот и културниот идентитет, како и еднаквоста на државите, се наведува во соопштението. 

Потенцирајќи дека нашиот Устав гарантира сеопфатна заштита на малцинските права, претседателката Сиљановска-Давкова ја квалификувала билатерализацијата на процесот на пристапување кон Унијата „како опасен преседан што нема да остане осамен“.

-Претседателката ја изрази својата лична заинтересираност за норвешката литература, филозофија и уметност. За неа норвешката демократија е инспиративен политички систем. Оттука го нагласи задоволството што двете држави повеќе од три децении негуваат одлични билатерални односи, како и очекувањето дека соработката континуирано ќе се зајакнува и унапредува во сите сфери од заемен интерес, а особено во економската област, рефлектирајќи ги потенцијалите на двете држави, информира Кабинетот. 

Специјалниот претставник Матисен на средбата истакнал дека и покрај тоа што Норвешка не е членка на ЕУ, целосно ги разбира нашите позиции.

-Тој дополнително подвлече дека денес, кога постојано се соочуваме со нови предизвици, посветеноста на принципите на меѓународното право и мултилатерализмот е поважно од кога било, се наведува во соопштението од Кабинетот на претседателката Сиљановска-Давкова.