Малком Икс доби улица во Анкара, на која ќе се пресели американската Амбасада

Новата локација на американската Амбасада во Анкара ќе се наоѓа на улицата „Малком Икс“, која денеска и официјално го доби новото име во чест на познатиот активист за човекови права, јави агенцијата Анадолија.

Новиот знак на улицата која го носи името „Малком Икс“ (Malcolm X Caddesi), е поставен во близина на новата локација на Амбасадата во населбата Чанкаја во Анкара.

Во октомври, Градскиот совет на Анкара едногласно ја прифати промената на името на улицата во чест на Малком Икс, кој е запаметен како лидер меѓу муслиманите во САД и активист за човекови права, потсетува Анадолија.

Малком Икс е роден во 1925 година, а убиен е на 21 февруари 1965 година во Вашингтон Хајтс, Њујорк, по неговиот релативно кус живот во постојаната борба за правата на црномурестите лица.