Камерон ќе претстави петгодишен план за отпор кон исламскиот екстремизам во Британија

Британскиот премиер Дејвид Камерон денеска ќе претстави петгодишен план за спротиставување на исламскиот екстремизам. Камерон ќе го претстави планот во говор во Бирмингем, а делови од говорот веќе објавија британски медиуми.

Според премиерот, неопходно е да се преземат акции против екстремистичката идеологија на Исламска држава за да се засили сплотеноста на нацијата.

- Постои опасност во некои наши заедници да го поминете целиот свој живот без да имате речиси никакви контакти со луѓе од различна вероисповед и потекло. Затоа кога групи како Исламска држава се обидуваат да привлечат млади луѓе кон својата отровна кауза, тоа им создава чувство на припадност кое можеби им недостасува дома, се вели во говорот на Камерон.

Се очекува тој да објави резултати од анализи како да бидат активно вклучени млади луѓе од етнички малцинства во интегрирање во општеството. Тој ќе го покрене и прашањето за улогата на муслиманската заедница во Велика Британија во борбата против ИД.