Запрена истрагата против управителот на дискотеката „Пулс“

Обвинителството ја запира истрагата против управителот на дискотеката „Пулс“, Александар Карадаковски.

„Со оглед на тоа што денешната 60 жртва од катастрофалниот пожар во Кочани е лице кое претходно беше опфатено со наредбата за спроведување истражна постапка, во својство на управител на правно лице, Основното јавно обвинителство Кочани по прибавување на официјалната документација за настапената смртна околност ќе донесе наредба за запирање на истражната постапка за него“, информира Јавното обвинителство.

Одлуката е донесена на денешниот колегиум на обвинителскиот тим кој работи на расветлување на трагедијата. На состанокот кој започнал со едноминутен молк за почит на загинатите, заклучено било дека Јавното обвинителство ги користи сите сили за ефикасно завршување на истрагата.

„Стручниот колегиум на Јавното обивнителство изрази целосна поддршка за досегашната работа на обвинителите, кои во моментов паралелно водат истражна и предистражна постапка од широк опсег со цел целосно испитување на одговорноста за овој настан“, велат од Јавното обвинителство. 

Засега под истрага се 33 лица, меѓу кои и тројцата градоначалници на Кочани. Откако Папазов поднесе оставка, а, владата неделава ја прифати, Општината во моментов нема градоначалник. Претседателот на Советот вели штом оставката на Папазов биде објавена во службен весник, ќе ја свика и седницата за избор на В.Д Градоначалник.

„Изборот се врши по истиот принцип како што се бира и Претседателот на советот. Може било кој од советниците, или, од координаторите на советнички групи да даде предлог и тој предлог треба, можат повеќе да бидат дадени како предлози и сите тие треба да бидат ставени на гласање и со мнозинство од бројот на советници, во оваа ситуација треба 10, од 19 советници да гласаат за еден од редот на советниците да биде избран како В.Д Градоначалник“, вели Лазо Митев, Претседател на Совет на општина Кочани.  

Со истрагата се опфатени и претходните двајца градоначалници кои со одлука на кочанскиот суд, ефективниот им беше заменет со куќен притвор.