Се води постапка против полицаецот кој не дозволи да се крене возилото на велосипедска патека

За сопственикот на возилото казна, полицаецот под лупа на внатрешна контрола – ова е епилогот од расправијата за паркираниот автомобил среде велосипедска патека во скопско Дебар маало.

Според она што се слуша од видеото на социјалните мрежи, колата непрописно стоела повеќе од 4 часа, а полицаецот вели дека возилото е службено.

По неколку минути, автомобилот, сепак, беше отстранет.

„Возилото е подигнато од страна на ПОЦ, а од страна на СВР Скопје преземени се мерки по член 63 став 6 од Закон за безбедност на сообраќајот на патиштата и на возачот на возилото С.К. издаден му е платен налог. Исто така, ве информираме дека предметното возилото не е на полициски службеник“, велат од МВР.

Според законот, казната изнесува 45 евра.

Градоначалникот на Центар објаснува дека пајак-службата постапува по налог на полициски службеник.

„Отстранувањето на непрописно паркираните возила е по налог на службено овластено лице. Во случајов нашите вработени воопшто не го стопираат кревањето, туку едноставно чекаат налог од страна на службеното лице, полицаец. По добивање на истиот веднаш постапуваат и го креваат возилото. Недозволиво е полициски службеник да не сака да си ја врши својата работа. Барам од МВР да ги санкционира полициските службеници кои не постапуваат при очигледни прекршоци“ напиша Герасимовски на фејсбук.

Од полицијата, пак, појаснија дека „веќе постапува Одделот за внатрешната контрола, криминалистички истраги и професионални стандарди при МВР“.

Освен од неправилно паркирани автомобили, тротоарите и велосипедските патеки низ Дебар маало често се блокирани и заземени од кафулиња и кафани, па пешаците и велосипедистите едвај поминуваат.