Студентите бараат поевтини автобуски карти за градовите од внатрешноста до Скопје и назад

Поевтино е да летаме до Италија, отколку да патуваме на релација Скопје - Струмица со повратна карта. Студентите се револтирани поради скапиот автобуски превоз. После короната, линиите се изретчени, а билетите поскапи за 100% покажува истажувањето на Комисијата за студентски стандард при УКИМ.

Студентското раководство побара од надлежните да си ја завршат обврската согласно Националната стратегија за млади за 23-27, во која има мерка за намалување цени на меѓуградскиот автобуски превоз за средношколци и студенти на територијата на цела држава и зголемување на редовноста на линиите. Стратегијата требало да ја спроведе Министерството за транспорт и врски, а реализацијата било предвидено да заврши во мај 2024 година.

Од министерството за транспорт за Сител велат дека во овој момент немале законска можност да интервенираат во цената. Вчера имале средба со студентите на која се разговарало и за субвенционирање на билетите за воз.

Сакаме да потенцираме дека Министерството за транспорт во овој момент нема законска можност да интервенира во цената,  со оглед дека тоа е пазарна категорија која ја утврдуваат самите превозници, посочуваат од транспорт. 

Студентите алармираа дека Македонска Каменица, Делчево, Демир Хисар и Крушево воопшто немаат пристап до меѓуградски превоз. Нивните колеги од овие градови воопшто немаат автобус со кој ќе може да патуваат и да се вратат во градот каде што студираат.