Сточарите не ги предаваат јагнињата во домашните кланици порадни ниските цени

Незадоволни од откупната цена за македонското јагне која се движи 210 денари за килограм жива мера, сточарите не го предаваат јагнето во македонските кланици. Бараат Владата итно да ја укине мерката со која тие се обврзани 50% од јагнињата да ги даваат на домашните кланици, за да може слободно да го извезуваат во странство каде цената достигнувала и до 300 денари за килограм. Само во пелагониско 70% од јагнињата не биле предадени.

„Пресметка беше со Министерството дека 273 денари нас не кошта производна цена на јагнето. Бараме да се доплати од Министерството таа цена ако веќе ги даваме јагнињата на 210-220 денари. Ова за неколку денови под итно да се реши, бидејќи времето за велигденските празници е веќе готово и ова ќе биде незапаметена година за сточарите во Пелагонија да остане јагнето дома“, рече Боби Бошевски, сточар од село Подино.

„Имаше предлог на состанокот од пред 2 недели до министерот за извоз на живо откупено јагне, надвор од државата, на повисока цена и ќе се откупеше цело јагне, но министерот не даде дозвола за извоз. Албанија, Косово, Бугарија, сите тие држави бараат големо јагне, Хрватска исто.

Цена за во странство?

Цена за во странство од 280 до 300 денари“, додаде Кирил Стефаноски, сточар од село Трап.

Пролем имало и со тоа што немаче добиено субвенции за 2024 година, исто така дури сега земале средства од мерката повраток за овчари за 2022 година.

„Од кланица јагниња се враќаат, големи јагниња не сакаат кланиците. Јас сум откупувач, ме знаат овде сточариве, не ги сакаат кланиците големите јагниња. Каде да ги носиме ние како сточари? Приватно не не оставаат да продаваме, плата не земаме, субвенции немаме, јагнињата ни стојат в штали, од што ние да живееме. Во Битола прашавме некни 650-680 денари, во Скопје 800 денари килограм јагнешко месо, а 200 денари ни ги земаат јагнињата. Големите јагниња 200 денари, не уценуваат сега. Лани ги изгубив и субвенциите и јагнињата ми останаа, 160-170 јагниња, годинава истото пак. Како ќе живееме ние, од што?“, изјави Марјанчо Стојаноски, сточар од село Новоселани.

Сточарите бараат итни мерки, во спротивно велат дека поради ваквата ситуација ќе продолжи да се намалува бројот на сточниот фонд во Македонија.