Кешишев: Дупката за Вања ја копаа пред да биде убиена

Откако на минатото рочиште Кешишев побара Палевски да биде отстранет од судница бидејќи му е страв да одговара пред него, денеска Палевски му постави 97 прашања. Кешишев пред судот кажа дека и тогаш и сега имал стравопочит кон Палевски, но и дека Палевски никогаш не му се заканувал.

Кешишев и денеска потврди дека додека чувал стража, ги видел Палчо, Велибор Манев и Боре Видевски како копаат дупка па дури потоа слушнал истрел, а Палевски бил со пиштол. Кога Манев даваше исказ кажа дека прво Палевски ја убил Вања, па потоа ги натерал да копаат дупка додека тој пушел цигара.

Одбраната на Палевски денеска го праша Кешишев, дали видел точно кој ја убил Вања?

„Бев далеку, тоа може да го потврди само Вељo, бидејќи беше до него“, кажа Кешишев.

За убиството на Панче, Кешишев и денеска тврдеше дека не видел ништо, бидејќи ги чекал во кангуто покрај патот Палевски, Видевски и Манев да се симнат со украдениот ситроен и отпосле дознал дека е мртов.

Зошто уште по првото убиство на Панче не се повлековте и покајавте?, праша адвокатот на Палевски.

„Не можев зошто премногу имав слушнато и уште првиот пат кога ми кажа Вељо дека не смее да знае никој за ова јас го земав здраво за готово“

Одбраната на Палевски вели дека изјавите на Кешишев и Манев се контрадикторни, а според адвокатот на Кешишев тој кажува тоа што го видел.

Кешишев кажа дека не го познавал таткото на Вања, ниту пак дека слушнал некакви договори со него, што споредот адвокатот Туфегџиќ повторно се потврдува дека тој нема никаква вина и е неправено обвинет.

На следното рочиште исказ ќе дава таткото на Вања, Александар Ѓорчевски.