Замислата на францускиот комичар Колуш функционира со години преку „Ресторани на срцето“

Во Франција започнува 35 кампања на „Рестораните на срцето“, хуманитарна помош замислена од францускиот комичар Колуш како одговор на сиромаштијата во неговата земја. Денес најголеми корисници, а ги има 900 000 се младите под 26 години, јавува дописникот на МИА.

Многумина од денешните корисници на помошта се лица кои го знаат Колуш по неговите скечеви, бидејќи тој веќе одамна не е меѓу живите. Францускиот комичар кој носеше панталони со прерамки и меѓу чии најпознати скечеви е тој дека „Сите луѓе се раѓаат еднакви, но некои се поеднакви од другите“, почина во 1986 година, откако во 1981 година беше еден момент прво несериозен, а потоа и сериозен кандидат за претседател на Франција. Тој својата асоцијација „Ресторани на срцето“ ја замисли како моментален одговор на сиромаштијата, која сакаше да ја искорени. Но тие 35 години подоцна се уште се тука.

Меѓу 900 000 лица кои имаат право на прехранбена помош, дури 51 отсто се млади под 26 години, покажаа статистиките од кампањата 2018-2019. Односно 39 отсто се малолетници -деца на родители кои земаат помош од асоцијацијата, 30 000 се бебиња а 12 отсто се на возраст од 18 и 25 години.

Оваа последна категорија на корисници се зголемува, за сезоната 2010-2011, тие претставуваа само 8 отсто од корисниците на помошта. Меѓу нив се невработените, но и вработени чии лични примања не се доволни за да ги покријат своите животни трошоци. А понекогаш има и студенти, кои порано ги немаше меѓу корисниците. Денес секој петти млад човек живее под прагот на сиромаштијата.

Најголемиот број од корисниците на помошта од „Ресторанот на срцето“, дури 80 отсто се лица кои живеат со 513 евра месечно, а другите 20 отсто се без примања.

Секој четврти оброк на Рестораните на срцето е финансиран од европската алиментарна помош, која според асоцијацијата денес е загрозена.

Од 2014 до 2020, глобалниот буџет на Европскиот фонд за помош на сиромашните (ФЕАД) на Франција и доделуваше 587 милиони евра, односно една третина од хуманитарната помош на Франција. Но таа помош може да биде намалена со идниот европски буџет, со што бројот на дистрибуираните оброци може да биде намален за двапати, па дури и четирипати.

Според бројките во Франција под прагот на сиромаштијата живеат 9,3 милиони лица, а 5 милиони редовно користат помош во форма на храна. Половина од лицата над 16 години кои одат во Рестораните на срцето бараат работа, 8 отсто имаат работа и 15 отсто се пензионери. Мнозинството 58 отсто се жени, со многу големо присуство на едно родителски семејства.