Штрајк на железничарите во Франција

Француската Национална железничка компанија СНЦФ предупреди дека штрајкот на вработените ќе предизвика хаос во железничкиот сообраќај во Франција и во Европа во вторник и среда.

Во соопштение од компанијата се појаснува дека само 15 отсто брзи возови и 25 отсто регионални возови ќе работат за штрајкот од 3 до 4 април. Имено, ќе сообраќа само еден од три возови меѓу Франција и Германија и 75 отсто Евростар возови што сообраќаат меѓу Париз и Лондон.

Возовите што сообраќаат меѓу Франција, Белгија и Холандија би требало да возат по нормален возен ред.

Четири синдикати повикаа вработените во железницата да штрајкуваат по двапати неделно секоја недела до крајот на јуни.

Со тоа изразуваат протест за планот на Владата за реформи во железничкиот сектор што предвидува и укинување на дел бенифиции за вработените.