Шарец: Треба да се запрашаме дали сакаме Словенија на Орбан или наша суверена Словенија

Словенечкиот премиер во оставка Маријан Шарец, на социјалните мрежи коментирајќи ги актуелните случувања во земјата порача сите треба да се запрашаат дали сакаат, како што напиша Словенија на Орбан или пак суверена Словенија, јави дописникот на МИА од Љубљана.

Овој став Шарец го изнесе по пишувањата на словенечките медиуми за наводниот начинот на кој се финансира партијата на Јанез Јанша СДС (Словенечка демократска партија) и медиумите блиски до нив.

Тој апелираше сите политички чинители наместо да разговараат кој каква позиција ќе добие и кој во кое Министерство ќе влезе, да се запрашат за кого ќе работи Владата.

– На кого таа влада ќе биде подредена ако медиумите блиски до СДС (ниту од СДС не го демантираат тоа) се финансираат од Унгарија? – напиша Шарец.

Премиерот во оставка обвини повеќе политичари дека наместо да ги решаваат проблемите на граѓаните тие повеќе работат да си обезбедат подобри позиции за нив.

Инаку, вчера лидерот на СДС, Јанез Јанша изјави дека е задоволен како се одвиваат преговорите за состав на ново мнозинство, а со тоа и нова Влада. Пред новинарите изјави дека имаат слични погледи со можните идни коалициони партнер, за приоритетите на Словенија и кои проблеми би требала да ги решава идната Влада под негово раководство.