Пребројување министерски места

Алијанса за Албанците на Зијадин Села обвини дека Коалицијата Вреди добила незначителен дел од колачот при преговорите за состав на идната влада.

„Во текот на овие три децении, Албанците воделе најмалку пет од 15 министерства, потоа шест од 15 ресори и на крајот осум од 16 министерства, без да се споменуваат министрите без ресор и вицепремиери. Се случува за прв пат Албанците да водат само четири министерства во најавената влада од ВМРО-ДПМНЕ и ВЛЕН, и тоа четири од 16 министерства“, се наведува во соопштението од Алијанса на Албанците (АА) предводена од Зијадин Села.

Според нив, ситуацијата ќе биде уште полоша бидејќи, како што наведуваат, ќе се носат законски измени за да бидат четири министертва за Албанците од 19 ресори.

Попладнецво со став излезе Коалицијата Вреди која смета дека добила значајни позиции а дека концептот на математичко броење е надминат.

„Броењето ресори со кој раководат Албанци е концепт кој не донесе ништо добро за нашата кауза. Напротив, благодарение на политичката корупција на режимот на ДУИ, чии функционери ги гледаа ресорите како алатки за богатење наместо да бидат сервис на граѓаните, ВМРО-ДПМНЕ на овие избори освои 58 пратеници и преговара од позиција на апсолутен победник во македонскиот политички блок“, велат од „Вреди“.

Преговорите за состав на идната влада се уште траат но се во финална фаза. Се очекува две министерски места во владата да добие и ЗНАМ на Максим Димитриевски.