Поднесено обвинение против главниот благајник на Ватикан поради сексуално насилство

Австралиската полиција денеска поднесе обвинение против Џорџ Пел, главен благајник на Ватикан поради сексуално насилство. Австралискиот кардинал Џорџ Пел е главен финансиски советник на папата Франциско и највисок католички духовник во Австралија. Тој е и највисок претставник на Ватикан обвинет за сексуално насилство.

Пел треба да се јави на суд на 18 јули.

Според полицијата, против Пел има голем број пријави, но не е прецизиран нивниот број. Католичката црква во Сиднеј негира обвиненија на австралиската полиција.

Во минатото биле поднесувани пријави во полицијата во врска со наводни сексуални насилства во австралискиот град Баларат во периодот 1976-1980 година кога Пел бил свештеник таму како и во источен Мелбурн од 1996-2001 година кога тој бил архиепископ. Минатата година Пел даде докази пред австралиската Кралска комисија за институционален одговор за сексуални насилства врз деца. Тогаш тој призна дека Католичката црква дозволила огромни грешки откако увидела дека илјадници деца биле силувани и сексуално малтретирани од свештеници на таа црква.