Од дивата депонија во Куманово досега изнесени 40 камиони смет

Четириесет камиони смет изнесе ЈП „Чистота и Зеленило“, во рамки на петдневната  акција за расчистување на дивата депонија, лоцирана на почетокот  од населбата „Перо Чичо“, која ќе трае уште два дена, најавија надлежните од општината на денешната прес-конференција.

 

Градоначалникот на општина Куманово, Зоран Дамјановски информираше дека до крајот на акцијата се очекува да бидат изнесени 60-тина камиони со смет. Тој апелираше до граѓаните совесно да се однесуваат со околината и посочи дека покрај комунален смет на долната страна од потегот има и градежен шут. 

 

- Локацијата се чисти повеќе пати, во изминативе години, но резултатите секогаш се исти.Апелирам до граѓаните да се однесуваат совесно кон околината и се надевам дека акцијата ќе заврши успешно. На долната депонија има поголема количина градежен шут, изјави Дамјановски.

 

Најави дека во наредниот период ќе ангажира комунални инспектори во две смени, но додаде оти и поставените камери не ги даваат очекуваните резултати. Сепак, потенцира дека инспекторите ќе почнат да изрекуваат мандатни казни и ќе бидат поднесени прекршочни пријави против сторителите.

 

Директорот на ЈП „Чистота и Зеленило“ Сашо Петрушевски, информираше дека на оваа локација има два контејнери по пет тони  во кои се собира поголема количина на смет, но и оти покрај тоа, граѓаните имаат навика сметот да го фрлаат токму на оваа локација.

 

Дамјановски на денешната прес-конференција најави дека наскоро започнува чистењето на речните корита во делот на сечење грмушки, диво израсната вегетација,по одлука на кризниот штаб како превенција од излевање на водите. Елекетронската аукција веќе е завршена и се очекува наскоро да биде потпишан договор. За чистење ќе се одвојат 2,8 милиони денари и ќе се чистат дел од реките Кумановка, Липковка, Којнарка и дел од Крива Река, приближно три километри.

 

Акцијата за расчистување на депонијата се спроведува согласно тековната програма што ја спроведува јавното претпријатие.