Само двајца пиротехничари ја покриваат цела Македонија, од ДЗС најавуваат промени

Состојбата со пиротехничарите во државата е алармантна, предупредуваат од Здружението на пиротехничари. Наместо најмалку 15, во Дирекцијата за заштита и спасување моментално работат само двајца.

Ефтим Митров, претседател на Здружението и поранешен раководител на пиротехничарите во ДЗС, вели дека недостигот на кадар ја загрозува безбедноста и ја отежнува работата на терен, особено во области каде и понатаму се откриваат неексплодирани убојни средства.

Вели,  ако не се преземат итни мерки, ситуацијата ќе наликува на онаа со недостигот на пилоти во институцијата.

Митров посочува дека до ова довела досегашната незаинтересираноста на институциите за решавање на проблемот, лошите услови за работа, недостатокот на заштита,  но и ниските плати.

Првиот човек на Дирекцијата за заштита и спасување, Стојанче Ангелов, потврдува дека во моментот институцијата ја води само со двајца пиротехничари. Според него, главните причини зошто нема повеќе заинтересирани за оваа професија се долгата и тешка обука и ниските плати.

За да се подобри состојбата, Ангелов иницирал двојно зголемување на платите на пиротехничарите. Тој очекува дека ова ќе ги мотивира новите кандидати да се вклучат во обуката и со тоа да се зголеми бројот на стручен кадар во иднина.

Според пиротехничарите, територијата на Македонија моментално е една од најзагадените со експлозивни убојни средства на Балканот. Еден од најризичните е Југоисточниот регион и линијата на Солунскиот фронт. Според проценките, гранати ќе се откриваат и во наредните дваесет до триесет години.