Над еден милион слободни работни места во Германија

Во Германија, побарувачката за работна сила се зголемува и во третиот квартал од оваа година за 1.097.600 работни места, што е за 175.000 повеќе во однос на истиот период минатата година, објави денеска Институтот за истражување на трудот  (ИАБ), кој дејствува во рамките на Федералната канцеларија за вработување.

- Во споредба со минатата година, побарувачката особено порасна во производствениот сектор, сообраќајот и логистиката, вели Александер Кубиш од ИАБ.

Експертите проценуваат дека високата побарувачка за квалификувана работна сила нема да може да се покрие со зголемената имиграција од земјите на Европската унија.

Побарувачката и натаму е голема во секторот на услуги, градежништво и трговија.

Најголемата побарувачка владее во помали компании со максимум 50 вработени, по кои следат средните претпријатија.

ИАБ четири пати годишно прави анкети во компаниите кои  имаат пријавено слободни работни места во Канцеларијата за вработување.

На крајот на октомври, повторно е забележана ниска стапка на невработеност - 5,4 отсто. Во октомври оваа година имало 150.000 невработени помалку отколку во истиот период минатата година.