Ковачевски – Матарела: Голема поддршка од Италија за натамошниот процес на евроинтеграциите на Северна Македонија

 Претседателот на Владата на Република Северна Македонија Димитар Ковачевски денеска оствари средба со претседателот на Република Италија Сеџо Матарела.

За време на средбата, како што информира прес-службата на Владата, Ковачевски бил придружуван од заменичката на претседателот на Владата задолжена за добро владеење, Славица Грковска и од министерот за внатрешни работи, Оливер Спасовски.

На состанокот се потврдени искреното пријателство и добрите релации помеѓу двете земји, со активен дијалог во билатералните односи, како и од значење за демократскиот развој на нашата држава. Истакната е јасната позиција на Италијанската Република дека проширувањето на ЕУ со земјите од Западен Балкан мора да продолжи, што се покажува неопходно и во рамки на глобалните, актуелни случувања, се вели во соопштението.

За време на средбата била нагласена и улогата на државата во регионот, како зема којашто ги решава предизвиците низ храбро лидерство, трпение и мудрости и е најавена голема поддршка од Италија и во натамошниот процес на европските интеграции на Северна Македонија, со цел забрзана динамика до полноправно членство во ЕУ.

-Премиерот Ковачевски се заблагодари за големата поддршка што ја дава Италија на Северна Македонија во трите децении од воспоставените дипломатски односи, во евроатлантските интеграции и посебно во рамки на процесот со којшто, по 17 години, конечно започнаа преговорите со ЕУ, информираат од прес-службата на Владата.

Претседателот на Владата истакнал дека државата се поставила стопроцентно и навремено на линија на политиките на ЕУ, во однос на војната во Украина, дека применува европски вредности и дека заслужува да биде дел од Европската Унија.

На состанокот, како што информираат од Владата е разговарано и за други актуелни прашања, посебно околу справувањето со предизвиците за обезбедување енергија, со коишто се соочуваат Европа и светот. Во таа насока е изразена заедничка согласност дека е неопходно ЕУ тесно да соработува и со државите од Западен Балкан, коишто треба да бидат земени предвид при можните решенија.