Изгаснати два пожари, во Делчево и Штип

Во два одвоени пожари кои избувнале вчера во Делчевско и во Штип горела борова и дабова шума и нискостеблеста трева. Повредени нема, причинети се само материјални штети.

Првиот пожар, како што информира МВР, избувнал вчера околу 11 часот кај местото викано „Цветков чукар“ во делчевското село Нов Истевник. Горела нискостеблеста дабова и борова шума. На местото излегле екипи од Територијалната противпожарна единица Делчево и Шумското стопанство „Голак“-Делчево, кои го изгаснале пожарот во 15:20 часот.

Со пожарот биле опожарени околу 50-60 декари борова и дабова шума. Увид на местото извршила екипа од Полициската станица Делчево и инспектори од Дирекцијата за заштита и спасување.

Вториот пожар пак бил пријавен вчера околу 13 часот во Полициската станица во Штип, од вработен во Територијалната противпожарна единица Штип.

Горела нискостеблеста трева до објект на ФК „Три Чешми“-Штип, при што објектот бил целосно опожарен. Пожарот бил изгаснат од екипа на Територијалната противпожарна единица Штип, а увид на местото извршила екипа од СВР Штип. Се преземаат мерки за расчистување на случајот.