Исламска држава го зазеде гасното наоѓалиште Шаер во источна Сирија

Групата Исламска држава денеска го зазеде главното гасно наоѓалиште Шаер, во источна Сирија, пренесоа британските медиуми, повикувајќи се на бунтовнички извори и невладини организации.

Ова  е прв борбен успех на џихадистите во реонот на Палмира, откако во март беа потиснати од градот.

Според агенцијата Амак, блиска на оваа џихадистичка група, борците воспоставиле контрола врз гасното наоѓалиште и неговите инсталации, каде биле разместени сириски војници. Џихадистите, притоа, убиле најмалку 30 војници и се здобиле со големо количество тешки орудија, вклучувајќи тенкови и ракети.

Сирискиот центар за мониторинг на човековите права потврди дека Исламска држава го зазела реонот на наоѓалиштето, што се наоѓа на околу 150 километри северозападно од Палмира. Настанот се случил по тридневни напади и покрај масовните воздушни напади за потиснување на џихадистите.