Двајца лесно повредени во експлозија на провладин митинг во Анталија

Во центарот на турскиот град Анталија, синоќа експлодирала рачно изработена бомба, што била оставена на клупа, информира телевизијата Си-Ен-Ен-Турк, цитирана од ТАСС. 

Лесно се повредени две лица, кои учествувале на провладин митинг организиран во овој дел од градот. Повредените веднаш биле префрлени во болница. На местото на настанот, што, според полицијата, се наоѓа на 150 метри од Плоштадот на републиката, се изведуваат истражни дејствија.

По неуспешниот обид за преврат, што беше изведен на 15 јули, низ цела Турција се одржуваат митинзи за поддршка на претседателот Реџеп Тајип Ердоган и владата, а ја имаат паролата „На стража на демократијата“.

Се очекува кулминацијата на овие акции да биде масовниот митинг, закажан за 7 август во Истанбул, забележува ТАСС.