Доделување на наградите Жан Моне

Делегацијата на Европската Унија во партнерство со Советот за
етика во медиумите вечерва ќе ги додели наградите  „Жан Моне“ за најдобра новинарска сторија и
најдобра репортерска фотографија, како и за најдобра аматерска сторија.

Наградата за најдобра новинарска сторија и најдобра репортерска фотографија се на тема „Градење доверба во несигурни времиња”, а наградата за најдобра аматерска фотографија ќе се додели за темата „Нашата различност, наша сила”.

Наградите ќе ги доделат евроамбасадорот Самуел Жбогар и почесниот претседател на жирито за наградата „Жан Моне“, Надежда Гаче.

Со жирито годинава претседава Надежда Гаче, актуелен директор и главен и одговорен уредник на неделникот Нови Магазин, Србија, која има долгогодишно искуство како уредник на некои од најголемите српски медиуми како ТВ Белград, Борба, Данас. Таа исто така била и претседател на Здружението на новинари на Србија.

Наградата, која годинава се доделува по 16-ти пат се состои од мали статуети за сите победници и ваучер за техничка опрема во вредност од 1.000 евра за победниците во категоријата најдобра новинарска сторија и најдобра професионална фотографија, како и ваучер во вредност од 500 евра за победникот во категоријата најдобра аматерска фотографија.