Бочварски: Домашна и меѓународна поддршка работи на проблемот со сајбер нападот во АД МЕПСО

Министерот за транспорт и врски Благој Бочварски денеска изјави дека се работи на надминување на проблемот со хакерскиот напад во АД МЕПСО со цел да се врати во функција тековното работење на компанијата.

Во изјава за медиумите дадена по направениот увид во изградбата на експресниот пат Ранковце - Крива Паланка, Бочварски рече дека најважно е тоа што критичната инфраструктура е заштитена и што непречено се одвива снабдувањето со електрична енергија кон граѓаните и компаниите. 

- Информирани се сите домашни и меѓународни институции и се работи и со домашна и со меѓународна поддршка во делот на надминување на сите овие прашања со цел комплетно да се врати во функција тековното и редовно работење на компанијата, рече Бочварски.

Ваквите сајбер напади, како што рече, не се нови и се случуваат и во другите држави од регионот.

Македонскиот електропреносен оператор (МЕПСО) АД Скопје вчера соопшти дека се соочува со кибер напад, но, дека целосниот интегритет на електро-енергетската мрежа и снабдувањето со електрична енергија не се загрозени.

- Во услови кога целиот свет се соочува со негативен глобален тренд на кибер напади и нашата компанија не остана имуна на тоа. Иако АД МЕПСО ги има превземено сите мерки за заштита од кибер напади од највисок степен сепак деновиве се соочивме со инциденти од тој вид. Имајќи предвид дека основната дејност на АД МЕПСО е пренос на електрична енергија и управување со електроенергетскиот систем ја информираме јавноста дека крититичната електроенергетска инфраструктура е безбедна,  целосно функционална и не е предмет на овој кибер напад. Тоа значи дека целосниот интегритет на електро-енергетската мрежа и снабдувањето со електрична енергија не се загрозени, информираше вчера МЕПСО.