Се заканува ли епидемија од сметот во Скопје?

Отпадот низ главниот град го вклучи алармот кај органите на прогонот и владата. Обвинителството издаде  наредба за истражување и обезбедување докази за  евентуално кривично дело во комуналното претпријатие. 

„Јавниот обвинител издаде наредби до МВР и до други надлежни органи за итно постапување и проверки во однос на работењето на ЈП „Комунална хигиена“. Доставени се барања до комуналните инспекциски служби да извршат вонреден инспекциски надзор и да ја констатираат моменталната состојба. “ 

Со одлука на Влада, МВР доби задолжение заедно со сите надлежни инспекторати да го истражат работењето на Комунална и градоначалникот на Скопје. Од владата соопштија состојбата е алармантна и институциите веднаш да постапат по заклучоците. 

„Се задолжува и Министерството за внатрешни работи, во соработка со надлежните институции, а се укажува на Град Скопје-Сектор инспекторат, да постапат согласно своите законски надлежности и да го испитаат работењето на ЈП Комунална хигиена-Скопје и градоначалникот на Градот Скопје во врска со несобирањето на комуналниот отпад, кој предизвикува опасност по здравјето на луѓето.“

На ова реагираше актуелната градоначалничка на Скопје преку соопштение. Арсовска го праша премиерот на кого се заканува а вината ја посочи кај претседателката и составот на управниот одбор на претпријатието и кај другите актуелни градоначалници. 

„За ѓубрето низ Скопје се одговорни ТВОИТЕ градоначалници кои сред избори повикаа граѓаните да фрлаат кабаст отпад, а немаат ни ресурси ни механизација да го собираат истото, па тоа ѓубре се мачат да го собираат вработените од КХС кои веќе се на крај на силите. За ѓубрето низ Скопје е одговорно ТВОЕТО министерство за здравство, кое МИЛИОНИ му должи на Комунална хигиена. Нив ќе им влезеш ли со полиција несреќо?“

Комуналното претпријатие е недостапно за изјави и информации. Оттаму попладнево испратија соопштение дека навремено ги исплаќаат платите на вработените. 

-  Нашите вработени испорачуваат основни услуги за градот а сме постојано саботирани од луѓе од власта. Ние ги исплаќаме платите на време и ќе продолжиме да го правиме тоа. Апелираме до Министерството за здравство веднаш да го исплати долгот од 5 милиони евра, за да не може никаков надворешен притисок или политичка акција да ја загрози егзистенцијата на нашите вработени.

Од Министерството за здравство тврдат дека немаат никаков долг кон претпријатието. 

- Тврдењата за неплатен долг од 5 милиони евра се неточни и целта им е да се нанесе штета на угледот на Министерството или да се амнестира некој од сопствените обврски. 

Неколку општини со своите служби го чистат дел од сметот по локалните улици. Градоначалникот на Центар испрати барање до ЗЕЛС за свикување итна седница за решавање на проблемот. 

Скопје станува потенцијално жариште на заразни болести. Полните контејнери и ѓубрето расфрлено околу нив се сериозна закана по здравјето на луѓето. На улица веќе се движат  стаорци и глувци, дали на повидок е нова епидемија во главниот град?

Граѓаните се сериозно загрижени и многу револтирани од состојбата во главниот град. Велат редовно ги плаќаат сметките за комуналии а услуга нема. 

 Со нашата камера направивме обиколка низ повеќе скопски општини и центарот на градот. Буквално насекаде контејнерите се преполни а сметот е расфрлан по улиците. Блокирани се тротоарите за пешаците и велосипедските патеки а ѓубрето го попречува и движењето на автомобилите. 

И социјалните мрежи се преплавени од фотографии од смет и преполни контејнери, расфрлан отпад по улиците. Граѓаните веќе бараат правна помош како да се справат со проблемот по институционален пат. 

Според светскиот ценар за контрола на болести повеќе од 35 сериозни болести како чума, туларемија и дезинтерија се шират токму преку глодарите. Досега македонските здравствени власти не излегоа со предупредување и информација како граѓаните да се заштитат.