Вонреден надзор во пет здравствени установи во Клиничкиот центар во Скопје

Општата санитарно-хигиенска состојба  на Универзитетската клиника за гинекологија и акушерство не е на задоволително ниво, а медицинскиот отпад не се селектира прописно, покажал синоќешниот вонреден инспекциски надзор спроведен од инспектори од Државниот санитарен и здравствен инспекторат и претставници од Кабинетот на министерот за здравство Арбен Таравари.

При надзорот спроведен по насока на министерот Таравари, е утврдено и дека во Ургентниот центар, на Ортопедија и во Институтот за белодробни заболувања и туберкулоза, општата хигиенско-санитарна состојба е релативно добра, за разлика од Трауматологија каде општата хигиенско-санитарна состојба не е на задоволително ниво, соопшти денеска Министерството за здравство од каде потенцираат дека веднаш преземаат мерки за отстранување на констатираните недостатоци.

Од Министерството за здравство наведуваат дека целта на надзорот е континуитет во одржување на општите санитарно-хигиенски и санитарно-технички услови во објектот, почитување на работното време, континуирана покриеност на приемните амбуланти за итни случаи, како и почитување на Законот за заштита од пушење, а по случаен избор се контактирани пациенти во однос на етички и професионален однос на здравствените работници.