Во земјотресот во Иран загина бремена жена, а стотина се повредени

Една бремена жена загина, а стотина лица се повредени во паниката по земјотресот со интензитет од 5,2 степени според Рихтеровата скала што синоќа ја погоди околината на Техеран.

- Повредени се 97 лица, 50 во Алборз, 34 во Техеран и 12 во Савех, изјави Мортез Салими, шеф на Агенцијата за спасување. 

Иако земјотресот не предизвика големи штети на објектите, десетина илјади жители ноќта ја поминаа на отворено, плашејќи се од нов земјотрес. 

Властите претходно ги повикаа жителите да останат смирени, но и да бидат подготвени за можни нови потреси.

Земјотресот бил на длабочина од седум километри под површината на земјата, со епицентар во Мешкин Дашт во провинцијата Алборз, на околу 50 километри западно од Техеран.

Според иранската државна телевизија, потресот бил почувствуван на многу места во северниот дел на Иран.

Силен земјотрес со интензитет од 7,3 степени минатиот месец уништи цели села и мали градови во западната провинција Керманшах, долж планинската граница со Ирак. Во потресот загинаа 600 луѓе, а илјадници беа повредени.