ВМРО ДПМНЕ: Јавниот долг надмина 5, а државниот 4 милијарди евра

Државниот долг во првиот квартал од годинава се зголемил за 0,3 процентни поени, а јавниот се намалил за 0,3 поени, соопшти МФ. Сега, државниот долг изнесува 39,7% од Бруто домашниот производ (БДП), додека јавниот долг изнесува 47,2% од БДП. 

На бројките реагираа од вмро дпмне. Од таму велат дека задолжувањето ги урна психолошките граници за помалку од една година од владеењето на економското цунами наречено влада на Заев. Државата тоне во долгови, а капитални инвестиции нема. За прв пат во историјата на Република Македонија јавниот долг скокна над 5 милијарди евра, а државниот над 4 милијарди евра.

Ги задолжуваат граѓаните за да си обезбедат пари за расипничкото однесување и тендерите кои си ги делат меѓу себе. Корупцијата цвета, картелот се богати, а пари за повисоки пензии и плати нема.

Сите во државата страдаат од неспособноста и незнаењето на оваа влада, освен фирмите на Заеви и Анѓушев кои метастазираат како канцер во македонската економија. Животот за нив можеби е дојден, ама не и за македонските граѓани, кои поради оваа неодговорна власт на СДСМ се натоварени со рекорден државен и рекорден јавен долг, стои во соопштението од опозициската партија.