Трамп очекува Маск да открие злопупотреби во Пентагон вредни милијарди долари

Американскиот претседател Доналд Трамп денеска изјави дека очекува Илон Маск да открие милијарди долари злоупотреби и измами во Пентагон како дел од истрагата која ќе ја спроведе Одделот за владина ефикасност што тој ја предводи.

– Ќе му кажам многу брзо, можеби во следните 24 часа, да провери во Министерството за образование. Потоа вооружените сили. Да ја проверам војската. Ќе најдеме злоупотреби и измами во вредност од милијарди, стотици милиони, рече Трамп за време на телевизиско интервју за Фокс њуз, зборувајќи за Пентагон.

Буџетот на американското Министерство за одбрана е приближно трилион долари годишно. Во декември, тогашниот претседател Џо Бајден потпиша нацрт-закон со кој се одбруваар 895 милијарди долари за одбрана за фискалната година која завршува на 30 септември.

Маск, за кој Белата куќа вели дека е специјален државен службеник, доби задача од Трамп да ги педводи активностите за намалување на работната сила во федералните служби на САД. Како дел од оваа иницијатива, соработниците на Маск се обидуваат да добијат пристап до доверливи информации во компјутерските системи на различни владини агенции.

Критичарите велат дека тоа е веројатно незаконски, се ризикува откривање на доверливи информации и ефективно се уништуваат цели агенции без одобрение од Конгресот.

Советникот на Трамп за национална безбедност Мајк Волц во интервју за Ен-Би-Си сугерираше дека постапките за изградба на бродови на Пентагон, кои тој ги опиша како „апсолутен хаос“, би можеле да бидат од особен интерес за Одделот за владина ефикасност, што го предводи Илон Маск.