Свет
25. March 2023 - 10:20

Терористичката „Исламска држава“ киднапираше 40 луѓе и уби 15 во централна Сирија

Припадниците на терористичката Исламска држава киднапирале околу 40 луѓе во централната сириска провинција Хама и убиле најмалку 15 од нив, објави опозициската организација Сириска опсерваторија за набљудување на човековите права со седиште во Лондон.

Исламската држава беше поразена во Сирија во 2019 година, но сè уште е активна и во Сирија и во Ирак, во мали делови од териториите што некогаш ги сметаше за свој „калифат“ и ги држеше под контрола.

Според Сириската опсерваторија за човекови права, како и државните медиуми, киднапирањата во Хама се случиле во четвртокот, а телата на убиените, некои од нив со пресечени грла биле откриени денеска.
Меѓу загинатите има седум цивили и осум вооружени припадници на сириските племиња, тврди оваа организација.

Провладиното радио Шам ФМ објави дека екстремистите ги нападнале земјоделците додека собирале тартуфи, дека некои од киднапираните паднале како „маченици“, додека контактот со другите бил изгубен.

Заспана ќелија на Исламската држава пред еден месец нападнала луѓе кои собирале тартуфи и убила 53 од нив. Меѓу убиените имало работници, но и припадници на владините безбедносни сили.

Тартуфите се сезонски деликатес во Сирија и можат да се продаваат по висока цена.