Сообраќајот по влажни коловози, слаб снег во Маврово и Стража

Сообраќајот на државните патишта се одвива тековно по влажни коловози во западните и југозападните делови од државата, а во останатите делови коловозите се местимично влажни. Врнежи од слаб снег има во Маврово и на планинскиот превој Стража, но во моментов не претставуваат пречка за одвивање на сообраќајот, информира Автомотосојузот на Македонија (АМСМ) во пладневниот извештај за состојбата на патиштата.

АМСМ препорачува внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани - Македонска Каменица - Делчево, Виница - Берово, Гостивар - Стража, Маврово – Дебар - Струга, Демир Капија - Удово, Катланово - Велес, Крушево - Демир Хисар и Ресен - Буково.

Интензитетот на сообраќај на патните правци надвор од градските средини е умерен. На граничните премини нема подолги задржувања за влез и за излез од државата.

Во сила е законската обврска за задолжително поседување зимска опрема во возилата, без оглед на временската состојба.