Шаќири: Во понеделник или вторник ќе имаме конечен договор со СОНК

Министерот за образование, Јетон Шаќири попладнево информираше дека продолжиле разговорите со СОНК околу платите на наставниците.

-На почетокот од наредната недела, понеделник или вторник ќе имаме конечен договор. Позитивно е што се отворија многу дискусии и околу колективните договори и мислам дека ќе имаме нов колективен договор. Вака ќе продолжиме и после преговорите со СОНК, рече министерот пред новинарите.

Според него, ставовите се доближуваат.

-Се разгледуваат сите можности. Ние имаме добра волја за изнаоѓање решение. Знаеме во која фаза сме за реализација и подготвка на буџет. Многу блиску сме до решение. Не сакам да спомнувам процент. Сакам ова да е последен штрајк со прекин на настава, кажа Шаќири.

-Разговаравме и за другиот дел на процентот. Условите во оваа година и другата да бидат подобри за тие што работат во образованието, додаде министерот.