Семејствата на загинатите во тетовската монтажна болница на протест во Скопје

Протестите за правда на семејствата кои ги изгубија роднините во пожарот во модуларната болница во Тетово, се селат во Скопје. По минатата недела, кога марш имаше во градот каде се случи трагедијата, денеска ќе се маршира во главниот град.

Маршот ќе започне од 14 часот од плоштадот „Скендербег“ во Скопје и ќе заврши пред Јавното обвинителство, велат организаторите.

Вечерта на 8 септември 2021 година во тетовската модуларна болница за ковид-пациенти се случи една од најголемите трагедии во историјата на државата. Потврдена беше смртта на 14 лица кои биле директни жртви на огнената стихија.