Рекорден пораст на бројот на новозаразени во Токио

Во Токио во изминатите 24 часа се пријавени 224 нови случаи на коронавирусот, што е најголем дневен биланс од почетокот на епидемијата.

Претходниот рекорд беше поставен на 17 април, кога за еден ден беа потврдени 206 нови случаи.

Јапонските власти соопштија дека зголемувањето на бројот на заразени во последните две недели главно се должи на тоа што се тестираат повеќе лица, особено оние што работат во објекти за забава за ноќен живот, како хостеси во клубови и барови. За време на панел состанокот кој денеска го одржа Владата во Токио, експертите рекоа дека зголемувањето е делумно резултат на систем на пообемно тестирање.

Поголемиот дел од новите заразени лица се на возраст од 20 до 40 години.

Во Токио во моментов има шест пациенти со коронавирус кои се наоѓаат во критична состојба, додека градот веќе две недели нема регистрирано смртен случај од Ковид-19.