Реконструкција на училишниот објект во Горно Нерези

Градоначалникот на општина Карпош Стевчо Јакимовски денеска изврши увид во реконструкцијата на училишниот објект во Горно Нерези, кој претставува дел од основното училиште „Братство“ во населбата Тафталиџе 2.

Општината со сопствени буџетски средства ќе изврши целосна реконструкција на внатрешноста на објектот кој датира од 1937 година. Ќе се оспособат училници и ќе биде опремена и канцеларија за наставниот кадар. Реконструкцијата на училиштето во Горно Нерези ќе чини околу 90.000 евра, а изведувач на градежните работи е фирмата „Мастаф“.

- Во општина Карпош постојат десет основни училишта. И покрај тоа што надлежното министерство треба да биде одговорно за одржување, ние во изминатите години извршивме целосна реконструкција, реновирање и подобрување на просторот во сите училишта. За оваа намена сме одвоиле околу 7 милиони евра, средства од буџетот, рече Јакимовски.

Тој нагласи дека со мало задоцнување, од 20-ти септември се очекува да почне наставата за учениците во реконструираното училиште.