Путин: Обвинувањата за системски допинг на руските спортисти се неосновани

Рускиот претседател Владимир Путин изјави дека обвинувањата за системски допинг спонзориран од страна на државата на Зимските олимписки игри во Сочи, се засновани на сведочењето на луѓе со скандалозен углед.

Светската анти-допинг агенција (ВАДА) вчера објави извештај во кој се наведува дека министерството и руската тајна служба организирале допинг програма во текот на Олимписките игри во Сочи.

- Обвинувањата против руските спортисти беа базирани на сведочењето на еден човек, човек со скандалозен углед. Прашање е дали заклучоците донесени врз основа на сведочењето на такви лица се меродавни и уверливи, изјави Путин.

Тој алудира на Григориј Родченко, поранешниот прв човек на анти-допинг лаборатории на Русија, кој сведочеше по повод случувањата со допингувањето.

Рускиот претседател за најновиот скандал вели дека е инструмент за геополитички притисок.

- Облиците на политички притисоци се менуваат, но суштината останува иста, а тоа е спорт да стане алатка за создавање негативен углед на одредени држави и народи, нагласува Путин.

ВАДА побара суспензија на сите руски спортисти на Олимписките игри во Рио де Жанеиро. За руските атлетичири, со одредени исклучоци, веќе постои таква одлука.