Преглед на вестите од светот
Граѓаните на Цетиње синоќа излегоа да им оддадат почит на жртвите од првиот ден од Новата година кога нивниот сограѓанин Ацо Мартиновиќ застрела 12 лица меѓу кои и две деца. Со неверување и во молк тие палеа свеќи. Инаку ова е второ масовно убиство во црногорскиот град Цетиње во последните три години. Во август 2022 година вооружен маж уби 10 луѓе, меѓу кои и две деца пред да биде застрелан. Затоа револтот кај граѓаните е огромен во однос на тоа како државата се справува со насилството.
Федералното биро за истраги (ФБИ) засега не гледа поврзаност меѓу терористичкиот напад во Њу Орлеанс и екслозијата на возило на Тесла пред Трамп хотелот во Лас Вегас. Безбедносните служби во САД ги истражуваат двата инциденти како терористички чинови и меѓу нив најдоа неколку чудни сличности. Двата инцидента се случија токму на Нова година, со временска разлика од неколку часови. И во двата случаи употребени се возила изнајмени преку апликацијата Туро, додека инволвираните лица служеле во армијата на САД. Во Лас Вегас имаше една жртва и две повредени лица.
Армијата на САД го идентификуваше возачот на Сајбертракот како постар водник Алан Ливелсбергер од Колорадо Спрингс. Тој бил во активна служба од 2012 година. Напаѓачот во Њу Орлеанс, кој прегази толпа луѓе со пикап камион при што загинаа најмалку 15 лица а околу дваесетина се повредени.
Делови од Велика Британија се погодени од поплави, а неколку домаќинства се евакуирани на неколку места во областа на Манчестер. Откако за два дена падна дожд колку просечни месечни врнежи, во делови од Манчестер автомобили беа поплавени до покривите, а беше прогласена и состојба на природна катастрофа. Според полицијата, тимови за спасување на планина се распоредени во областа Манчестер за да им помогнат на пожарникарите во спасувачките операции на поплавените имоти и со заглавените возила. Поради поплави и налетите на ветерот, беа откажани новогодишните прослави на отворено, како и огнометите во Единбург и во неколку други градови.
-
Марјан Ников
Сите содржини од овој новинар