Вол Стрит загуби пет трилиони долари, Трамп вели - „Падот на акциите оди многу добро“

САД од денеска стартуваат со наплаќање на еднострана царинска давачка од 10%.

Австралија, Велика Британија, Колумбија, Аргентина, Египет и Саудиска Арабија се први на удар. Овие држави од денеска на американските пристаништа, аеродроми и царински складишта се соочуваат со повисоки давачки.

Царините кои се движат од 10 до 50%, за останатите 50-тина главни трговски партнери на САД пак стартуваат од среда.  Увозот на Европската Унија ќе биде погоден со царина од 20 проценти, Македонија со 33%, додека кинеските стоки ќе бидат царинети со 34 отсто, со што вкупните нови давачки на Трамп за Кина ќе достигнат 54 отсто. Кина веќе најави контра удар, па од среда воведува тарифи кон САД од 34% проценти.

Трговската војна помеѓу двете најголеми светски економии, ги потонаа светските берзи. Вол стрит бележи рекордна загуба од 5 трилиони долари за само два дена. Пад од 5% бележи и водечкиот германски индекс DAX, значителен пад има и кај шпанскиот и францускиот берзански индекс. 

Инвеститорите стравуваат од глобална рецесија, додека Трамп падот на берзите го следеше од своите голф терени во Флорида. Пред заминување од Белата куќа, кусо порача дека „падот на акциите оди многу добро“ 

- Мислам дека оди многу добро. Имаме операција, како кога пациентот е опериран и тоа е голема работа. Реков дека ова ќе биде точно како што е. Ќе имаме 6 или 7 трилиони долари кои  доаѓаат во нашата земја. Пазарите ќе цветаат, акциите ќе цветаат, земјата ќе цвета. Многу држави долго време не искористуваа, сега гледаат како да постигнат некаков договор со нас. Многу години бевме на погрешна страна, рече Трамп. 

Изминатите денови пад бележи и вредноста на доларот, како и цените на нафтата и суровините, додека инвеститорите се свртеа кон безбедноста на државните обврзници.