Преглед на вестите од светот

Фон Дер Лајен: ЕУ е подготвена за контрамерки на царините на САД

Претседателката на Европската комисија Урсула фон дер Лајен во четвртокот ги опиша царините на американските Доналд Трамп како голем удар за светската економија, додавајќи дека Европската унија е подготвена да одговори со контрамерки доколку разговорите со Вашингтон не успеат.
Фон дер Лајен рече дека длабоко жали за потегот на САД и предупреди на „огромни последици“ за глобалната економија, вклучително и ранливите земји кои се соочуваат со некои од највисоките американски царини.

САД воведоа нови санкции против Русија, за првпат по инаугурацијата на Трамп

САД воведoа нови санкции против Русија, за првпат откако Доналд Трамп влезе во Белата куќа во јануари годинава. Компаниите се дел од мрежа која, со поддршка на Иран, испраќала суровини, оружје и чувствителна стока од Русија до јеменските Хути. Според процените, обемот на таквите испораки  изнесувал  десетици милиони долари и, меѓу другото, вклучувал и жито украдено од окупираните територии во Украина.
По овие мерки поврзани со поддршка на тероризмот, САД разгледуваат и поагресивни санкции и за руската нафта и нејзината флота во сенка, пренесоа синоќа дел од американскте медиуми повикувајќи се на службени лица од Белата куќа.

Русија и Украина продолжуваат со нападите на енергетските постројки

Русија и Украина меѓусебно се обвинија дека ја погодуваат енергетската инфраструктура и покрај претходниот договор за запирање на нападите врз таквите објекти. Украинските сили двапати ја нападнале руската енергетска инфраструктура во областа Курск што резултирало со прекин на електричната енергија за повеќе од 1.500 домаќинства.

Украинскиот претседател Володимир Зеленски на Телеграм соопшти дека руски дрон погодил трафостаница во регионот Суми, додека со артилериски напад бил оштетен далновод во регионот Днепропетровск, оставајќи речиси 4.000 корисници без струја.

Специјалниот пратеник на американскиот претседател за Украина и Русија, Кит Келог изјави дека конфликтот во Украина е на работ на прекин на огнот, но дека двете страни мора да постигнат договор. Келог истакна дека Трамп е „вознемирен“ од акциите на двете страни, но дека САД имаат намера да бараат целосен прекин на огнот.

Сојузниците на НАТО ветија повеќе од 20 милијарди евра безбедносна помош за Украина во 2025 година, изјави генералниот секретар на НАТО, Марк Руте. Тој додаде дека Командата на НАТО ќе продолжи да ја координира воената помош за Украина и обуката на украинските војници.

Најавата за воена помош за Украина уследи по стравувањата дека американската поддршка за Украина може драстично да се намали, бидејќи администрацијата на американскиот претседател Доналд Трамп се обидува да изнуди мировен договор, а истовремено ги повикува европските сојузници да ги зголемат трошоците за одбрана.