Преглед на вестите од светот

Актуелниот претседател на Хрватска и кандидат на опозициската Социјалдемократска партија (СДП), Зоран Милановиќ, победи во сите хрватски жупании, а најмногу гласови доби во Истра, Меѓумурје и Вараждин, додека кандидатот на владејачката Хрватска демократска заедница (ХДЗ), Драган Приморац, победи само во странство, покажуваат објавените резултати на хрватската Државна изборна комисија (ДИК).
Милановиќ убедливо го  доби првиот круг,  но падна под 50 отсто од гласовите. Тоа значи дека за две недели ќе се оди на втор круг.

Негов противник во вториот круг ќе му биде второпласираниот Драган Приморац, кој освои - 19,5 отсто, но премиерот на Хрватска Андреј Пленковиќ, кој е и лидер на ХДЗ е убеден дека Приморац може да направи пресврт.

Вториот изборен круг ќе се одржи на 12 јануари.

Џими Картер, 39-тиот претседател и добитник на Нобеловата награда за мир, почина синоќа на 100-годишна возраст во својот дом во Плејнс, Џорџија, соопшти неговиот син Џејмс Е. Картер, без да ја наведе точната причина за смртта. Картер беше најстариот жив американски претседател на сите времиња.

Во последниве години тој се лекуваше од агресивна форма на меланомски рак на кожата, со тумори кои се прошириле на црниот дроб и мозокот.
Актуелниот претседателот Џо  Бајден изрази сочувство за смртта на 39-от претседател на САД и добитник на Нобеловата награда за мир, Џими Картер и го прогласи 9 јануари за ден на жалост во негова чест.

Американското знаме беше спуштено на половина копје на Капитол Хил.