Посебен сообраќаен режим утре во Тетово поради делегација од Саудиска Арабија

СВР Тетово информира дека утре (11 јануари) во Тетово ќе се воведе посебен сообраќаен режим по повод доаѓањето и престојот во градот на висока делегација од Собранието на Кралството Саудиска Арабија предводена од Абдулах Бин Мухамед Ал Шеикх. Посебниот режим ќе почне од од 5 часот и 30 минути и ќе се применува до 12 часот. 

-Во овој период се апелира до граѓаните без поголема и неодложна потреба да не се движат со нивните возила во овој дел од градот или да ги паркираат на споменатите улици, да имаат трпение и целосно да се придржуваат на наредбите и насоките од полициските службеници на СВР Тетово. Со тоа, граѓаните најнепосредно ќе придонесат да не се наруши непреченото и безбедно движење на гостите од Саудиска Арабија, и воопшто нормалното одвивање на сообраќајот во Тетово, истакна Марјан Јосифоски, портпарол на СВР Тетово.

Изменетиот режим ќе се однесува и применува на улицата „Маршал Тито“ од влезот - излез на Тетово до градскиот плоштад и обратно, потоа на потегот од градскиот плоштад до крстосницата со улицата „Браќа Миладинови“ и обратно и на улицата „Браќа Миладинови“ на потегот од крстосницата со улицата „Илинденска“ до крстосницата со улицата „Ѓорче Петров“.