Плеј оф: Куманово изедначи, МЗТ Скопје поведе со 2-0

Екипата на Куманово го изедначи резултатот на 1-1 во победи против Карпош Соколи, додека МЗТ Скопје Аеродром веќе има водство од 2-0 против Фени Индустри во полуфиналето од плеј-офот на кошаркарскиот шампионат на Македонија.

 

Куманово до првиот триумф над Карпош Соколи стигна пред својата публика во мечот кој го доби со 66:63.

 

Репрезентативниот тандем Трајковски-Костовски беа најзаслужни за оваа победа на кумановската екипа. Бојан Трајковски средбата ја заврши со дабл-дабл ефект од 12 поени и 13 скокови, додека Александар Костовски на 13 поени придодаде и шест асистенции. 

 

Во Кавадарци, Фени Индустри иако водеше во најголемиот дел од натпреварот против бранителот на титулата, на моменти и со двоцифрена предност, сепак во последната четвртина актуелниот шампион успеа да направи пресврт и на крајот да слави со 91:87 за водство од 2-0 во победи. 

 

Најзаслужни за победата на МЗТ беа Урош Локовиќ со 31 поен и 17 скокови и Данило Мијатовиќ кој постигна 26 поени.

 

Полуфиналната серија која се игра во три добиени натпревари продолжува утре со третите натпревари кои ќе се играат во Скопје.