Пациентите од трагедијата во Кочани, во втора и трета фаза ќе се лекуваат во штипска Клиничка

Со отпуштање на повредените пациенти од дискотекета „Пулс“ во Кочани, од болниците во земјава и странство, завршува првата фаза од нивното лекување. Медицински лица и претставници на Министерството за здравство извршија увид во состојбата на штипската Клиничка болница за прием на пациентите за лекување во втора и трета фаза. 

- Значи сега тие пациенти се во активна прва фаза, бидејќи на нив има се уште активни хируршки интевенции и третмани од интензивно лекување. По отпуштањето дома, ние како болница можеме да преземеме преврски на некои полесни пациенти и бевме во одделот за физикала терапија да се направи увид. Во подалечна иднина, во трета фаза, тие пациенти би требало да добиваат физикален третман, а за тоа најблисок центар во Македонија им е Клиничка Болница – Штип, изјави д-р Влатко Захариев, директор на КБ-Штип

Сугерирано им е, сегашните трикреветни соби во физикална да се преуредат и преадаптираат во еднокреветни и двокреветни, со цел подбро лекување. Дополнително ќе се одлучува, кои пациенти имаат потреба од понатаможно лекување, дали ќе биде амбулантско или ќе бидат хоспитализирани.

- Во зависност од големината на преврските и зафатеноста на телото од изгореници ќе се направи проценка со нашите лекари, со пластичните хирурзи и секако во консултација со лекарите од Скопје би одлучиле кои пациенти каде ќе лежат и како ќе се лекуваат, додаде Захариев.

Специјалистите по пластична хирургија од Клиничка болница- Штип, ќе помагаат и во Општата болница во Кочани.