Дисциплинска постапка за двајцата полицајци кои лажно тврделе дека возилото „Порше“ е службено

Дисциплинска мерка ќе се утврдува за двајцата службеници од 6-та управа кои лажно тврделе дека поршето во Дебар Маало е службено возило. Се работи за лица кои се дел од личното обезбедување на претседателката на државата.

Ова го констатирале од МВР по извршените проверки откако беше објавеното видео на кое се гледа како група граѓани реагираат на пајак службата да го отстрани непрописно паркираното возило пред скопска кафеана во Дебар маало.

Пред пајак службата излегле две лица кои се легитимирале и кажале дека возилото е службено, а полицаецот од пајак им укажал веднаш да го препаркираат. Во меѓувреме според сопштението на  МВР, тој влегол во кабината за да провери дали навистина се работи за службено возило. Токму овој потег на полицаецот предизвика револт и реакции кај граѓаните. 

 - Откако утврдил дека возилото не е службено и дека сè уште не е отстрането, на вработените од ЈП Јавни паркиралишта им дал наредба да го подигнат возилото, по што истото било пренесено во депото. Двете лица кои се претставиле како полициски службеници и тврделе дека возилото е службено, со патничко возило „форд мондео“ се упатиле кон депото. Полициски службеници  извршиле проверки за возилото „форд мондео“ и констатирале дека истото го управувале полициските службеници Т.Д. и И.С. распоредени во одделението за лично обезбедување на претседателот на Македонија.

Возачот на поршето е казнет, а како што веќе објавија медиумите се работи за екс министерот Срѓан Керим. Тој според информациите бил во скопската кафеана со сопругот на претседателката чие обезбедување реагирало на пајак службата. Опозициската СДСМ побара одговорност од министерот за случајот.

Пред внатрешната контрола на МВР ќе одговара и полицаецот кој веднаш не нареди подигање на возилото. Настанот во Дебар Маало се случил на 22 март по пријава на граѓанин на 192 кој јавил дека возило е паркирано на среде велосипедска патека по што на терен излегла пајак службата на општина Центар.