Мицкоски: Потребен е механизам за спречување блокади на билатерална основа

Да се воведат механизми кои нема да дозволат билатерални спорови да се пречка за остварување на заедничка цел, ваква порака испрати премиерот Христијан Мицкоски од состанокот на постојаниот комитет на парламентарното собрание на НАТО чиј домаќин е земјава.

Според Мицкоски, досега биле направени многу отстапки и одрекувања за остварување на државните цели како што е членството во НАТО, но како што вели, потребен е механизам за спречување блокади на билатерална основа, со кој ќе се одблокира и европската иднина за државата.

„Пријатели си помагаат, но и пријатели искрено си ги кажуваат своите чувства и забелешки. Сметам дека треба да се размисли и за воведување на механизми каде нема да се дозволи билатерални спорови да бидат пречка за остварување на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер, и заедно и посветено ќе работиме кон остварувањето на колективните цели“, изјави Христијан Мицкоски, Премиер.

Пред шефовите на парламентарните делагации од земјите членки на НАТО, Мицкоски се осврна и на трагедијата во Кочани по која сојузниците ја покажале својата солидарност. Помош понудиле десет европски држави, а преку механизмот за цивилна заштита на ЕУ дел од повредените заминаа на лекување во странство..

„Оваа трагедија ни покажа дека солидарноста не е само збор, туку дело што ги поврзува народите. Таа е темелот на нашата Алијанса-принцип што не води во заедничките напори за зачувување на мирот и безбедноста. Солидарноста значи дека кога еден од нас страда, сите страдаме. Кога еден е во неволја, сите притрчуваме на помош. Во изминатите пет години од нашето членство во НАТО, активно придонесувавме кон колективната безбедност и стабилност на Алијансата“, изјави Христијан Мицкоски, Премиер.

Состанокот на Парламентарното собрание на НАТО кој се одржува во Скопје доаѓа на петгодишнината од членството на земјава во северноатланската алијанса, а денеска се одбележуваат и 76 години од основањето на НАТО како камен темелник на европската и северноамериканската безбедност..

Учеството на македонската армија во мисиите на НАТО и заедничките вежби, според Мицкоски се доказ за посветеноста на државата за целосна усогласеност со членките на сојузот за колективна одбрана.

Одржувањето на состанокот во Скопје, пак, според министерот за одбрана е потврда на сојузничката соработка.

Воената и билатерална соработка биле тема и на средбата меѓу Мицкоски и Мисајловски со двајца конгресмени од Соединетите американски држави, а како што велат од амбасадата во земјава, на средбата била истакната заложбата за продолжување и зјаканување на партнерството како врвен приоритет за промовирање на безбедноста и стабилноста во регионот.