Националниот аеродром во Брисел ќе остане затворен најмалку до крајот на неделата

Националниот аеродром во Брисел, Завентем, ќе остане затворен најмалку до недела, а дотогаш сите летови се преусмеруваат на помалиот јужен бриселски аеродром Шарлроа, јави дописникот на МИА од Брисел.

 

По вчерашниот терористички напад на аеродромот каде 14 лица го загубија животот, а 100 беа повредени, според менаџментот на „Бриселс Ерпорт“, направена е огромна штета за која ќе биде потребно време да се поправи и состојбата на еден од најголемите аеродроми во Европа да се врати во нормала за истиот да може да проработи.
 

- Се уште тече истрагата на аеродромот и ние се уште не сме ниту влегле во делот за заминување за да ја оцениме штетата – вели портпаролакта на аеродромот Анке Франсен.

Иако училиштата, шопинг и административните центри во Брисел и насекаде низ Белгија денеска ќе функционираат и покрај максималното Четврто ниво на закана од можен нов терористички напад во белгиското Кралство, дел од големите компании, спеак, одлучија денеска да бидат затворени. Тоа е случај со мега-продавницата за мебел „ИКЕА“ и нејзините два центри во бриселските населби Завентем и Андерлехт. Причината, според менаџментот е тоа што најголем дел од вработените во компанијата пристигнуваат со метро или воз, а двете линии се во прекин или имаат силни рестрикции, поради што „ИКЕА“ најавува отворање дури во текот на утрешниот ден.