Муцунски учествуваше на 15. сесија на Комитетот на експерти за јавна администрација во Њујорк

Македонскиот заменик министер за информатичко општество и администрација Тимчо Муцунски учествуваше на 15-тата сесија на Комитетот на експерти  за  јавна администрација при Економскиот и социјален совет на Обединетите нации, што се одржа во изминатите четири дена во Њујорк. 

Како што соопшти денеска Министерството за информатичко општество и администрација, учесниците на средбите меѓу другото дискутирале за  идниот развој на современите јавни администрации и како тие треба да бидат креатори на продуктивни политики во интерес на граѓаните.  Се дебатирало и за подобрување на ангажманот и комуникацијата меѓу владите и засегнатите страни, за отворена влада и електронски и мобилни решенија, како и за зајакнување на довербата на граѓаните во ефикасноста, веродостојноста и интегритетот на јавната администрација. 

- Муцунски во својата дискусија ја афирмираше заложбата на Владата на Република Македонија за постојано унапредување на условите во јавниот сектор, како за вработените така и за граѓаните кои се приматели на услуги. Притоа заменик министерот ја нагласи важноста од имплементацијата на новите системски закони од оваа сфера, кои се донесени во консултација со Европската унија и други меѓународни експерти, се вели во соопштението од МИОА.