Миркуловски проговори за својата здравствена состојба по двата исцрпувачки меча

Филип Миркуловски во неколку наврати заврши со грч на лицето поради хроничната повреда која ја влече, а која ја обнови на мечот со Словенија, но како и секогаш, беспоштедниот борец стисна заби и повторно беше важен дел од триумфот на Македонија во дуелот со Црна Гора.

 

Со истиот, нашата репрезентација обезбеди пласман во главната фаза и обезбеди виза за Вараждин, а што е најважно, сосема релаксирано ќе го пречека последниот дуел во групата, односно директната борба за првото место со Германија.

 

Словенците ни докажаа дека Германците не се непобедливи, а покрај тоа што ја искоментира својата здравствена состојба, популарниот „Жути“ ни откри и каков ќе биде пристапот на ракометари и дали ќе има одредено штедење против фаворитот за да се биде максимално подготвен за втората фаза.

 

– Ќе видиме како ќе оди, ќе продолжиме со терапиите, а лекарите досега добро си ја вршат работата, – оптимистички изјави Миркуловски во врска со неговата повреда на зглобот, а потоа како играч кој најдобро ги познава Германците даде свое видување за последниот дуел на Македонија во оваа почетна фаза на Европското првенство.

 

– Секако дека одиме на „три од три“, нема потреба од штедење. Играме натпревар за прво место. Факт е дека сме заморени, Германците се посвежи поради тоа што имаат поголема ротација, но сепак видовме дека и тие се ранливи. Не се непобедливи, ќе анализираме добро и ќе излеземе на мегдан со нив. Ние секогаш играме подобро кога не сме фаворити, – заврши еден од најискусните играчи во нашиот тим.