Либиската Влада на единството ги презеде своите извршни функции

Либиската Влада на единство, која има поддршка од ОН, денеска ги повика институциите во оваа земја да почнат со трансфер на власта врз Владата на единството и ја повика меѓународната заедница да престане да комуницира со ривалските тела во власта.

Претседателскиот совет минатиот месец ја именуваше Владата на единство, но незиното признавање беше одложено заради тоа што либискиот Парламент, што е сместен на истокот од земјата, не и имаше изгласано доверба, пренесоа британските медиуми.

Советот денеска, меѓутоа, соопшти дека документот за поддршка на новата влада е потпишан од повеќето пратеници во Парламентот, како и другите политички фигури, што и дава „зелено светло за почеток на работата“.

Либија од средината на 2014 година имаше две ривалски администрации, кога признатата влада беше принудена да го напушти Триполи откако здружените милиции, заедно со исламистите, влегоа во престолнината, наведуваат француските медиуми.