Јужна Кореја ги продолжи анти-ковид мерките поради омикрон

Јужна Кореја денеска ги продолжи правилата за физичко растојание воведени поради Ковид-19 за дополнителни две недели бидејќи расте бројот на заразени со Омикрон.

Во сила останува и полициски час од 21 часот за рестораните и ограничување на приватни собири до шест лица.

Ограничувањата требаше да бидат укинати во недела, но премиерот Ким Бу-кјум рече дека продолжувањето е потребно за да се забави ширењето на омикрон поради страв дека прославата на кинеската Нова година, која заврши во средата, може да предизвика бран зараза.

Новиот дневен број на инфекции е тројно зголемен во последните две недели, но бројот на смртни случаи и сериозни инфекции остана релативно низок во земјата која има висок процент на вакцинирани.

Јужна Кореја денеска пријави рекордно дневно зголемување од 27.443 нови случаи на Ковид-19, вклучително и 24 нови смртни случаи.

Речиси 86 отсто од 52 милиони луѓе во земјата се целосно вакцинирани, а 53,8 отсто примиле и засилувачка доза.