Израел почнува „тактичка пауза“ на воените дејствија во три области во Појасот Газа

Израелските одбранбени сили објавија дека ќе започнат „тактичка пауза“ на воените дејствија во три области на Појасот Газа, како дел од мерките за справување со влошената хуманитарна ситуација.

Армијата соопшти дека ќе ги прекине операциите во Муаси, Деир ал-Балах и Газа Сити од 10:00 до 20:00 часот секој ден, почнувајќи од денеска до понатамошно известување. Исто така, соопшти дека ќе идентификува безбедни патишта за да им помогне на агенциите за помош да доставуваат храна и друга помош до луѓето низ Газа.

Најавата за паузата доаѓа по месеци предупредувања од експерти за ризикот од глад предизвикан од ограничувањата на Израел за хуманитарна помош. Критиките од странство, вклучително и од блиски сојузници, се интензивираа откако неколку стотици Палестинци беа убиени во последните недели додека се обидуваа да стигнат до точките за дистрибуција на храна.

МИА